洪禮賢講馬：騎師王賠率隱藏味 柏寶高水非佳兆

港陌

　　季尾時分講過好幾次，唔理係邊個大騎師、大馬房，嗰期賽事係冇「腥氣」，任佢哋賽前嗰手馬點勁點醒，前中後場次粒粒皆星又如何，嗰期冇馬贏就冇馬贏。唔使睇邊個，啱啱禮拜三谷戰，柏寶咪有咁上下嘅遭遇，6匹熱門坐騎，係得隻「火熱動感」有Q，其他全數食蕉。

　　眼見「火熱動感」陣上嗰種拼搏心態，搏輸冇得好講，而「贏啲啲」全程好位，返嚟冇P，又好似唔關佢事。至於，「吉利大哥」、「超勁精神」得第四，大致上跑啱晒。唯一要彈係得「易搏贏」，使唔使擺到咁前，不過，賽後報告解晒畫，要插，亦插唔得好深。

騎者連續兩期谷戰冇頭馬

　　唔查過都唔覺，原來柏寶已經連續兩期谷戰冇W到手，呢個現象對於大眾嚟講，講得誇啲，近乎災難咁滯，喺呢兩期之中，佢有6匹馬捧成大熱或次熱門，只係交出兩Q，試諗吓嗰筆熱門死火嘅數幾襟計，動輒一千幾百萬實走唔甩，所以，點會唔影響深遠。

　　其實，如果有跟開騎師王賠率嘅馬友，唔難察覺上期柏寶係危危乎，事關佢隔晚有4、5匹熱門，賠率約在2至4倍，居然騎師王開飛有廿幾三十蚊，有咁嘅高水賠率，多多少少顯示到有啲味？！

馬會賽馬節目主持　洪禮賢