足球泡沫害人不淺

港陌

17/06/2011
文： 渡邊年

以往一個球季完咗，跟住就係大量轉會新聞，但近兩三個星期嘅足球新聞，卻充斥住酒色財氣、烏煙瘴氣，唔係呢個球星嫖妓出軌，就係有地方出現假波操控，連管晒全球嘅國際足協都冇得幸免，真係睇到都眼冤。




唔係報紙雜誌專登摷嘢嚟講，係實實在在放喺眼前嘅問題。其實歸根究柢，都係一個錢字作怪。一個簡單嘅例子，啱啱滿十九歲嘅英格蘭小國腳菲爾鍾斯，畀曼聯捧到天咁高，一千六百五十萬鎊轉會費，即係二億一千萬港紙，而佢嘅周薪據聞已經去到七萬鎊，即係八十八萬港紙。陰功，我哋香港人又上街又示威，XXX先至派六千蚊，仲要等咗幾個月先公布點樣攞，佢一個十九歲o靚仔一個星期就有一百四十六個人嘅六千蚊，你話佢唔亂fing錢，真係搵鬼信。


錢太易搵 百病叢生


依家個轉會市場都癲嘅，早前有調查話啲英超球會出糧都出到虧損，都唔明佢哋點樣運作，成日搵老細攞錢出嚟就算，球會財政唔健康，啲球員有錢就搞到生活唔健康，細細個就學埋嫖妓吸毒，對錢財管理根本冇概念。




如果英超聯賽會真係為班後生仔好嘅，應該學NBA咁，設立「工資帽」，啲青年軍上到一隊頭嗰幾年人工有限制，而且要搵個專人跟住佢哋，教佢哋做人處事，否則呢一代球員好多洗腳唔抹腳，晚年境況真係不敢想像！