借題發揮：超磅都要騎川河勁駒 韋達喼弗搶盃

猪拉多纳

　　今季最後1場級際賽上演嘞，太子珠寶鐘錶精英盃1400米草地，盃王大摩出4駒，「步步穩」、「新力勁」、「飛闖」及「傾力之城」，隊形梗係勁，如果問，呢條team 勁喺邊？！前中後置跑法都有晒，講速度有「傾力之城」，守好位有「步步穩」，如鬥後勁可交畀「新力勁」，如果由大摩捧盃，完全唔意外。

　　同場其他人馬，係咪坐晒冷板櫈，擔當花瓶角色， 好大可能...... 除咗蔡約翰， 佢單線1 匹「川河勁駒」，已經有權打破大摩壟斷嘅局面。只因上場休息好耐復出，可以大勝一批二班好手如「超群如意」及「家樂飛」，絕對唔容易。

　　冇錯，由二班跳級上嚟挑戰group，難度好高，呢點係事實，而大摩雙雄「步步穩」和「新力勁」係級際賽熟客仔，經常跑到入三甲，一比之下，實力會略有不及，惟此賽不是平磅，上述兩駒要負133及128磅，「川河勁駒」則輕飄飄，多少會拉近彼此距離。

　　最後一提，韋達今季好少會騎113磅之馬，之前只得1匹「驌龍」（超重兩磅），今次佢勒住肚皮都要造115磅（可能超磅），唔通為孭鑊？！

Jack