岐阜屎波花臣多博札幌好過

猪拉多纳

19/06/2011
文： 九叔

搞職業波，唔單只隊波要踢得，仲要識玩市場推廣，日乙隊FC岐阜响宣傳呢瓣做得唔錯，好似今日主場對札幌岡薩多咁，又出Trade Card，又搞抽獎，弊在佢哋踢波嗰瓣唔掂，整幾多花臣都冇用，呢場波平手盤都寧願博客隊札幌。（開賽時間：周日下午5:00）


Trade Card節連抽獎谷人氣


早幾日前，岐阜宣布同台灣體育學院合作，成為日本首支職業球隊同外地大學結盟，攜手培育教練以至唔同梯隊嘅青年球員。跟住佢哋响對札幌呢場波，又推出一組球員Trade Card，連稅都只係賣19蚊港紙左右，仲順便搞埋首屆岐阜Trade Card節連抽獎，啲簽名波、Trade Card獎品多到有1,600幾件，實會吸引唔少Fans入場。




經咁樣一谷，岐阜呢場波一定人氣好旺，可惜呢支日乙包尾大幡，玩副業醒過正職，踢波就完全唔掂，近8場波只得1勝1和6負，最近3次主場遇着札幌，都只係1勝2負，根本就信唔過，雖然札幌今場有10號仔宮澤裕樹、古田寬幸同龍門李昊乘養傷，不過近8場波佢哋都叫做攞到5勝3負，起碼識得贏波先，平手盤冇理由唔博客隊。