洪禮賢講馬：千兩寶寶換人放到

港陌

　　第六場三班1000米。「千兩寶寶」季初曾以1.09.71贏四班谷草1200米，保持咗季內該程締速最快好一段時間，已經唔係一般四班頭馬。之後傷過、放過草，冇跑大半年，復出喺谷草1000米入Q，讓14磅輸條毛畀「辣得喜」。雖然唔可以假定佢耐冇出賽，對能力打幾多折，亦唔可以假定佢唔係排外欄，早段用多咗力切入，就會頂到尾。但根據佢造出嘅頭兩段時間，足以喺三班夠爭，呢點幾可肯定。

　　今仗升到三班跑，唔用小將，減磅相對少咗，不過，用番韋達，運用隻馬嘅段速，應該會拿捏得好好多。仲有兩點有利地方，休出第2仗，能力增值係正常預估；其二，由11檔變4檔，早段要攞欄，唔會嘥好多力，直接幫到中後段嘅貫注力，有力放到。

御將軍破宿命

　　第七場三班1200米。一睇「御將軍」往績，真係唔應該揀，之前3次勝後再出（俱跑勝途），冇1場可以跑到入P，呢項「傳統」已跨越3個季度，其實幾好「路」，況且佢5歲先至喺評分最高位，的確有幾大壓力。但另一方面，僅僅比上場多負4磅，而賽前唔係冇做嘢，仲有檔好及隨時遇到水戰，睇落唔係冇機會破宿命。

馬會賽馬節目主持　洪禮賢