借題發揮：今晚風雨難料 揀馬兩手準備 淋地三雄隨時發難

魑魅魍魉

　　今晚跑馬地賽事，唔係冇機會喺橫風橫雨之下進行，如颱風打唔成，跟尾梗有雨，除非咁好彩，跑馬嗰幾個鐘頭，跑馬地上空一滴雨都冇，如果受天雨影響，唔理賽前係甚麼熱門實力馬，遇上跑變化地的話，話瓜就瓜，唔使理由！之所以，今晚賽前刨馬，真係要兩手準備。

　　睇過今期賽事上陣馬嘅變化場地往績，譬如「真奇寶」、「百利旺」、「御將軍」等，俱有打水戰根據，當然，今晚仲有不少上陣馬識跑淋地，唔係只得3駒而已，阿Jack只係舉吓其中例子。但上述3駒有個共通點，匹匹都有分頭，熱極嘅「御將軍」都有4個開，中1隻已經封蝕本之門。

　　先講「真奇寶」，今季跑極唔贏，要知道上季又係差唔多時間，喺1場好黏地賽事勝出。而今場此馬排到好位，跟前跑法又着數，如果到時場地慢，爭勝能力自然提高。

御將軍見水識飛

　　「百利旺」目前分數仲低過季初贏馬時，上場亦唔係冇走勢，一旦有地利，此匹老馬隨時發難。而「御將軍」，打水戰識飛，如果落住雨跑，隻馬更加開心，只要唔係贏馬飽咗，只加4磅再戰，哪有影響！

Jack