心跳格食格恰死前鋒

魑魅魍魉

22/06/2011
文： 蘇豪

日職連續兩周開快車，因為踢埋今個星期就會小休一個月，是日重心係清水心跳，心跳季初出閘脫腳，但近期已全面回勇，近五場聯賽不敗，射手高原直泰腳風極順，兩場入三球，加上澳洲幫保斯基同保斯拿頻頻有士哥，主場出擊唔會驚任何對手。翻查往績，心跳近六次主場對前鋒贏晒，包括上季贏二比○。




事實上，兩隊踢法迥異，前鋒側重小組進攻，踢得順嘅時候攻勢水銀瀉地，而心跳則簡單實際，兩隊各有所長，但事實係心跳近年確係剋死對手，呢啲叫係格食格，唔到你拗頸！何況今場心跳仲有得受讓平半，咁筍嘅盤去邊度搵？捧下盤！ （周三下午6時開賽）


黃蜂勁頹 紅鑽有餐開


同日浦和紅鑽主場對福岡黃蜂，紅鑽近況雖差，但對住黃蜂仍綽綽有餘，因為黃蜂今季表現奇劣，十一戰只和一場，其餘全敗，如果紅鑽連黃蜂都贏唔到，真係好難向球迷及高層交代，一於博佢哋反彈，揀「讓球主勝」。




（now 633周三下午6時直播）