緊張足球中國唔Work！

猪拉多纳

23/06/2011
文： 波男

中國足球值得回憶嘅事唔多，不過大家一定記得大約十年前米路天奴域提倡嘅「快樂足球」，而今屆國奧隊主帥、98世界盃季軍克羅地亞領隊巴拉斯域（內地譯：布拉澤維奇），卻提出一套相反論調，就係「緊張足球」，點知話口未完，國奧隊喺外圍賽對阿曼即告失利，問你死未？




米路同巴拉斯域同樣來自前南斯拉夫，佢哋都係世盃名帥，米路曾帶領多支不同球隊殺入決賽周，而巴拉斯域亦試過喺98年世盃率領克羅地亞闖入四強，兩人執教功力有番咁上下，但教波理念就徹底相反。




米路主張「快樂足球」，喺管理上採放任態度，練波內容亦唔嚴格，落場比賽盡量畀球員自由發揮，國家隊喺佢主持下歷史性打入世盃決賽周，雖然喺決賽周連輸三場出局，但米路亦係笑住落台。


極嚴紀律 國奧唔受


巴拉斯域卻係一位緊張大師，對球員極度強調紀律，有內地傳媒報道國奧隊情況，練波時要求嚴苛唔在講，又規定球員搭車期間唔准大聲講話，連笑都唔准，有極端例子甚至誇張到連沖涼時唱歌都會被責罵。




中國足球一直搵緊自己嘅出路，由米路到巴拉斯域所見，國足同國奧做咗兩個完全相反嘅實驗，暫時所見，巴拉斯域嗰套都幾大鑊，除非國奧隊喺次回合可以神奇作客反勝阿曼，否則國奧出局，亦可宣布「緊張足球」實驗失敗，原來中國球員只可以氹，係唔逼得o架！