巴拉圭智利攜手做細界

猪拉多纳

23/06/2011
文： 朱楓

為備戰7月初舉行嘅美洲國家盃，巴拉圭聽朝會同智利拍跳，可惜兩隊都有主力射手唔踢得，今場唔似會大手交易，咁嘅情況，梗係捧入球細最實際啦！（開賽時間：周五早上7:00）




早喺今年5月尾，巴拉圭已頻頻踢熱身賽備戰美洲盃，至今踢咗4場取得2勝1和1負，睇落表現唔錯，但實情對手實力一般先係關鍵，當中只係阿根廷二隊、南美弱旅玻利維亞同歐洲二流球隊羅馬尼亞，根本唔反映真正實力。


巴里奧斯腸病毒入院


聽朝對智利前，巴拉圭仲收到壞消息，就係多蒙特射手巴里奧斯腸胃突受病毒感染嘔咗成晚，被送院接受緊急手術，有傳可能緣盡美洲盃，加上賓菲加射手奧斯卡卡度素又落選今次大軍，單靠近年狀態急跌嘅辛達告魯斯喺前線孭飛，火力唔令人擔心就假。




智利近排狀態大勇，日前主場大勝愛沙尼亞4:0後，已累積7場不敗，當中近期人氣急升嘅射手阿歷斯山齊士都有入波。不過智利領隊保格希日前已批准呢位「智利C朗」今場對巴拉圭免役，等佢可以暫時離隊去西班牙處理轉會巴塞隆拿嘅事務，感性啲睇就叫有人情味，但理性啲睇就同自斷一臂冇分別，今場作客一向守強過攻嘅巴拉圭，真係隨時窿窿完場都唔奇！