洪禮賢講馬：家樂飛 輕磅佔優

魑魅魍魉

　　第九場三班1600米。「滿地金」首仗跑得好好，正如上賽前已指出，如果當時唔係直路隻馬一再唔肯聽命於騎師，未能早早拉出嚟望空，以最後百幾米衝落個勢，要攞一席位置唔係難。話晒落地第1場兼路短，自己陣上仲錯完又錯，都可以跑得咁近，插班個分唔會啃唔落。

　　上賽未有太大改善，出閘仍然戇居居，直路一樣唔多肯同個騎師合作，依然唔識走直線，惟因路程增長，並已跑過1場，名次再進一步，不過，坦白講，以嗰場末段表現，如果隻馬或卓利是但1個發揮好啲，根本已有P。總之點講都好，有本事黐住「超群如意」及「家樂飛」返嚟，嗰個殿軍水平放喺今場，真係夠爭有餘；本身喺外地負重唔怕（131磅曾獲冠亞各一），今次133磅應該唔係太大負累，而由1400米轉至此程，並改用安國倫，更對提升能力有幫助，已有出頭機會。

　　第十場二班1400米。「家樂飛」連續兩場二班賽都輸，喺呢班嘅形勢似乎漸漸見頂，由於今場用吳嘉晉，少咗10磅，可能又有番優越感。另外，因為排檔唔差，隻馬可採用跟前守好位跑法，用小將而出錯嘅機會相對減少，倘發揮正常，入圍成數高。

馬會賽馬節目主持　洪禮賢