高清睇跑馬:禮尚往來好穩陣

猪拉多纳

　　「禮尚往來」頭兩戰贏馬過程精采，次次遲望空兼遲撻着，但一樣後上險勝，看來只是鞍上人睇住來食。再睇蹄下敗將如「財運」、「風雲武士」、「明海光輝」及「勁贏晒」等，之後均取得頭馬，便知「禮尚往來」質素極高。上仗牠於總場次602的三班1200米取得三連捷，蹄下敗將更犀利，亞季軍「喜惑」及「伽羅」接戰補中，前駒殺上二班後繼續上名；另外，至吸引是「禮尚往來」之前兩戰留前鬥後，上仗則突然採取主動，全程走二叠望空，入直路一加速即輕鬆直抵終點，跑出1分09秒29乃今季三班同程第二快時間；勝後唞夠重來，馬房鎮倉寶為保全勝佳績必拼，穩膽。

　　「如願以償」上季跑新馬賽時，曾連續兩戰以兵不血刃姿態取勝，但編班後要適應步速，結果等到今季第二仗先再響勝鼓。大前仗賽後被驗出不良於行，蔡約翰即安排牠休息近四個月，結果前仗復出跑1400米即入Q，證明路程啱跑。

　　試準後「如願以償」上仗於總場次660再跑同程，強手盡去補中乃意料中事，兼且韋達一鞭冇打按韁贏馬而回，可見今次殺上二班無阻力；埋門試閘狀態呈勇，篤定添食。

Sam