賠率有路捉：確叻迅外檔都有飛

猪拉多纳

　　噚日晏晝，發現飛數核心竟然唔係四大馬房，而係賀廐。賀賢呢次出五匹馬，除咗第七場隻「賽特樂」冇飛，其他全部隔晚唔係大熱門，就係次熱門，睇嚟志不在小，不妨跟吓。

　　尾場二班1400米，「確叻迅」今次明顯有捧場客，睇番佢季內九戰的最後賠率，除咗大前仗試過10倍開跑，其他都係徘徊喺16至66倍之間，雖然有飛嗰次都唔算太叻，只係得第八，但偶一為之嘅票數，都要關注一吓。呢鋪再次有飛，噚日獨贏曾得7.9倍，P仲熱過一度成為大熱W嘅「如願以償」，得2.4倍。

　　睇番呢匹馬上季嘅整體表現，不難猜測飛數由來，同佢季頭季尾表現好啲有關，事關佢上季兩場頭馬分別喺呢兩個時候。雖然佢今季初最叻都係跑第四，但好難保證季尾唔會決心谷起交代，今次既然排外檔都有信心飛，喺二班評分又有着數，唔揀佢等幾時？

馬偉昌惡馬多

　　騎師王方面，有三位騎師先喺賠率上惡鬥一番，分別係以4倍開盤嘅柏寶、4.5倍嘅馬偉昌，以及4.25倍嘅韋達，好老實，柏寶及韋達都賣到咁「冷」，唔會再期待佢哋好似上周日咁贏到開巷，但對馬偉昌而言算係突然有飛，手上又有「麗晶之星」、「大衛金剛」及「最著數」等惡馬，捧佢比較穩陣。

周仲