河床最後輓歌

猪拉多纳

26/06/2011
文： 笛子波童

河床貴為阿甲史上奪標次數最多球會，今季卻面臨創會一百一十年以來首次降班危機。周一凌晨護級附加賽次回合，河床主場如果未能收復落後兩球失地，來季便要降落乙組比賽。觀乎球隊首回合表現，再加上今仗有三名主力艾美達、柏保路費拉利及艾達拔圖路文停賽，面對愈戰愈勇嘅乙組仔貝格拉諾冇必勝把握，波童捧「讓球客勝」。（周一凌晨2時開賽）




今年係河床創會一百一十周年紀念，不過球隊上下都肯定冇心情慶祝，波童於附加賽首回合賽前已講過，河床搞到咁折墮完全冇得怪人，佢哋最後一場秋季聯賽其實只要擊敗拉魯斯便可逃出生天，可惜最終卻於主場輸波，上周中面對貝格拉諾亦全場捱打，當球隊落後○比二時，有河床球迷忍唔住衝落球場指罵球員，足證球迷對球隊表現已經到了忍無可忍地步。


河床「贏唔夠兩粒」即降


根據阿甲賽例，如果附加賽兩回合打和，將不計算作客入球優惠，甲組一方可以直接留級，換句話說河床今仗必須淨勝兩球或以上，但球隊沉咗咁耐，要在關鍵大戰及時回勇實在談何容易，而且隊長艾美達、守將柏保路費拉利及艾達拔圖路文因累積黃牌夠數要坐波監，戰鬥力打折扣，想爭勝難上加難。


示威內亂 無力回天


據傳媒報道，上周中有數百名球迷包圍球會主場示威，矛頭直指會長巴薩里拉及教練荷西盧比斯，最終要勞動警方出動水炮才平息事件，場內場外氣氛都咁差，就算有主場之利都幫唔到幾多。貝格拉諾自從二月尾不敵羅沙里奧中央，近八場作客取得四勝四和不敗佳績，有力保住勝果。