東瀛魔女美斯孭飛大炒格

猪拉多纳

27/06/2011
文： 走肖

東瀛女足今晚喺女子世盃B組登場，日本女足首戰對新西蘭女足，一於捧1.57倍「讓球主勝」。今屆日本女足有「少女版美斯」岩淵真奈孭飛，相反對手新西蘭女足係大洋洲極品魚腩，過去兩次出戰女子世盃，分組賽6戰全敗狂失20球，而且每場至少淨輸2球，相信今場都係捱打格局。（有線64周一晚9:00直播）


新西蘭上屆分組賽全敗


過去5屆賽事，日本女足得95年入8強，其餘4屆全部分組賽出局，不過，近年佢哋出現咗個未來亞洲女球王岩淵真奈，佢喺08年、09年連續兩年當選亞洲最佳年輕球員，而且係08年U17女子世盃MVP，超強突破能力有如少女版美斯，依家佢得18歲，首次出戰女子世盃肯定希望爭取表現，信佢要捧「讓球主勝」。




另一方面，新西蘭女足喺2010年女子大洋洲國家盃5戰全勝封后，表現好似衰唔晒，但其實佢哋91年、07年兩度出戰女子世盃，6場分組賽全部輸晒，而且期間得1個入球、狂失20球，完全係陪跑格，就算有件曾經効力阿仙奴女足嘅射手希雅恩，佢喺今屆女子大洋洲國家盃攻入12球成為神射手，一樣信唔過。