美國北韓大混戰

猪拉多纳

28/06/2011
文： 樂比堅尼

香港時間周二晚及周三凌晨在德國上演兩場女子世界盃C組分組賽，重頭戲由美國女足對北韓女足。呢一組表面上美國超晒班，但其餘三隊都有力擾亂大局，好似世界排名第八嘅神秘部隊北韓，就有能力成為攔路虎。今場賽事兩隊都有入球能力，樂比仔捧1.75倍大盤。（有線64台周三凌晨零時15分直播）




兩隊上屆世界盃又係編喺同一組，當時兩隊打和，可見實力非常接近，事隔四年，美國雖然仍排世界第一，但整體實力唔見得強咗好多，好似去年舉行嘅美洲金盃兼世界盃中北美洲區外圍賽，美國曾倒灶輸畀墨西哥，最終僅得季軍，故今場熱W得1.42倍真係唔吸引。




北韓係傳統女足強隊，目前世界排名第八，如果佢哋肯多踢熱身賽嘅話，相信排名再高幾位都唔奇，佢哋上屆世界盃輸畀冠軍德國出局，可以話係非戰之罪，但分組賽表現卻相當好，力壓實力強勁嘅瑞典取得出線權，面對美國亦不落下風打和二比二，共出現四個入球，今場隨時又大交收！


世盃三度交鋒全大


北韓今次入選球員全部來自國內，而且相當年輕，最後生嘅金秀景只得十六歲，另外仲有好多球員係二十歲以下，勝在體能好兼拚勁十足，雖然佢哋喺熱身賽表現麻麻，但呢啲賽事志在熱身，隱藏實力嘅機會好大，兩隊交手例多波入，三次喺世界盃碰頭全部開大，今場一於再追！