叱咤楓雲：「美女」老化嚴重撐北韓「客勝」

猪拉多纳

28/06/2011
文： 朱楓

今晚女子世界盃C組爆發「最老Vs最嫩」對決，由「老兵」美國迎戰「幼獅」北韓。「花旗國」本身老化問題嚴重，今次陣前仲有大將傷出，對住「神秘之師」北韓，恐怕會重蹈上屆覆轍，朱楓會捧2.6倍「讓球客勝」！（有線64及中央5台周三凌晨0:15直播）




對上5屆取得2冠3季嘅美國被捧為「死亡C組」出線大熱，可惜「花旗國」近年受國內女子職業足球發展停滯影響實力大跌，之前喺女子金盃4強竟不敵墨西哥，最後喺附加賽幾經辛苦先擊敗意大利殺入今屆世盃決賽周。講到底，美國今屆最大問題就係老化嚴重，平均年齡高達28.55歲，係今屆女子世盃最老嘅球隊，點知早前再有中場主力泰比莉因傷退隊，話冇影響就呃你嘅！




近年進步神速嘅北韓，已連續4屆殺入女子世盃。今屆平均年齡只得20歲零11月，係女子世盃史上平均年齡第3細嘅一隊，佢哋早前曾喺熱身賽大勝歐洲勁旅英格蘭3:0，為咗備戰仲閉門訓練態度認真，今晚絕對有力重溫上屆同美國打成2:2嘅美夢，再嚇對手一跳！