洪禮賢講馬：醒目精英賽績夠堅

猪拉多纳

　　第十場三班1400米草地。「醒目精英」賽績已反映有唔錯質素，上陣5場，係得甩腳踏嗰場冇三甲。其餘4場，喺四班跑田草中短途，又或是三班初戰谷草，一樣交足貨。如果以佢初次由1000米檻上1400米嗰場去衡量實力，佢喺三班唔會留得耐，因為嗰場頭馬係「好得意」，目前已升穿90分，手上累積4W。到佢開齋一役，二三名係「夢想家」及「漸信良駒」，至少係四班識贏之流（後駒仲係三班前列常客），所以，上場初跑三班賽入Q其實係應份。

　　睇番上賽直路嘅際遇及表現，出彎後畀對手擯入死位，之後要由內檔移出中檔再衝過，但係唔可以怪白德民，因唔係佢可避免及阻止，要怪就怪出彎後外側有隻「銘記心頭」，而前路又有「沙紙」和「聚有盈」塞住。

　　另一方面，睇落就算冇連番意外，佢有冇本事衝得贏頭二馬，確有保留，以末段時間及勢頭所見，殿軍「吉利大哥」仲似樣。總之，「醒目精英」重新開氣後，跑番1400米，威力會大好多。

　　第十一場一班1650米泥地。「萬能駒」喺泥地一哩太堅，咁耐以來，係得1場因心律不正跑到冇晒影。而今季5場此程成績，係得高雅志騎嗰場冇Q，可見練者睇得有幾通，隻馬交得有幾準。今場唔重磅而檔位ok，發揮正常應有三甲。

馬會賽馬節目主持　洪禮賢