富咸新帥落鑊炒魚腩

猪拉多纳

30/06/2011
文： 笛子波童

新一屆歐霸盃今晚正式展開，英超富咸於第一圈外圍賽主場迎戰法羅群島業餘球隊NSI魯納維克。NSI過去6次參與歐洲賽從未試過晉級，而且12場比賽輸足11場，難聽啲講係正宗魚腩，富咸新帥祖爾首次領軍作戰，必求大勝省招牌，富咸讓三球都捧「讓球主勝」。 （周五凌晨2時30分開賽）


祖爾領軍晨早開操


富咸上季英超排第八，不過卻以公平競技身份取得歐霸盃入場券，今季佢哋最大變動係由荷蘭主帥祖爾接替曉士領軍，由於祖爾之前教過熱刺，所以佢對今次重返倫敦顯得特別肉緊，為備戰今仗，球隊早於六月中已開操，今場係祖爾首場正式領軍比賽，而且仲係主場出擊，當然希望可以大勝一場打響頭炮。




球員方面，富咸今季放走了謝拉、卡馬拉、艾迪莊遜及彭素爾，暫時未有重要收購填補空缺。此外，美國國腳丹普西及墨西哥後衞沙斯度因為踢完美洲金盃未歸隊，今仗亦唔會落場，但整體實力依然高過對手幾班，對爭勝影響不大。


NSI抽到富咸已賺咗


NSI魯納維克來自法羅群島一個只有4,000人居住小鎮，07年歷史性首次贏得聯賽冠軍兼進軍歐聯，之後亦連續三屆有份亮相足協盃或歐霸盃，可惜全部都在首圈外圍賽出局。雖然球隊近年於聯賽經常名列前茅，但陣中球員多屬業餘性質，教書、賣電話先係正職。




翻查NSI過去6次參加歐洲賽，踢咗12場比賽錄得1勝11負，擺明志在參與，今次抽中對富咸，有機會得到一筆可觀門票收入已經賺咗，想爆冷只係天方夜譚。


歐霸盃首圈外圍賽賽制


有份亮相歐霸盃第一圈外圍賽球隊，大部分係來自歐洲足協系數排名較低國家，例如法羅群島、盧森堡、格魯吉亞等等，而且佢哋並非所屬聯賽冠軍分子，實力較參差。歐洲足協為表揚公平競技，每屆都會簽發「外卡」畀公平競技得分最高國家參賽，上屆最高分為英格蘭、瑞典及挪威，故此富咸、赫根及阿里辛特可以額外獲得一個參賽席位。