洪禮賢講馬：喜綵福到多多神殿白蹄烏 印度光輝有盈有利財運神州八號

猪拉多纳

　　今日賽事8草3泥，感覺上，唔少場合熱門馬未必如想像中咁穩陣，會唔會連場迭爆唔敢講，但投X時，部分熱門宜秤清楚啲先好。

重心場次　第4場　第四班（60-40分）1200米草地



　　「一路奇兵」落班後唔同晒，假假哋四班此程未輸過（3W）。雖然，唔係咁解釋到上場直路咩事會衝唔起（或甩蹄鐵），總之，今仗寧負重而唔用見習生，肯在配搭上花心思，未必係韋達棄騎咁簡單。

　　「享耆成」加面箍後轉埋跑法，上場入Q可掟甩後面對手，證明升呢。「駿方」用10磅仔，就算再擺前走，預計會比上賽更韌。「出人意表」5月頭曾缺課，好在之後段工夫完全唔使就住，以佢初出可上名表現，如進度唔係受到太大影響，應有三甲。

　　「清風駒」唔叻，可取係襟跑兼有穩定嘅一面。「喜寶龍威」以目前陣上水平，跑轉彎路程未必好過直路賽。

第1場　新馬　1200米草地

　　「華美之星」初出輸最後一步，以腳法嚟講，跑長200米會較合。「路路好」與「牛精威旺」，目前進度以前駒較理想，至少加配備後有改善，後駒則要視乎跑完1場自己有幾大改善。

　　「風雲」贏大閘時間唔算快，卻顯示到有唔錯纏鬥力。「好好機會」兩大閘都係騎得幾犀利，論反應則未算理想，要睇佢質地有幾好。

第2場　第五班（40-0分）1200米草地

　　「揀得準」沿路外叠，上場仍有Q，其實幾有難度，如騎者今場喺取位上做得更好，有贏面。

　　「駿盈」和「嘻哈大少」能力未必係最強，勝在有靚檔，跑法亦略進取，應可賺到形勢及腳程。「金剛驃」淪為五班馬，完全估唔到，而上場慢閘兼蝕位仍可在直路追幾多，要跟。「小蜜蜂」和「確有心得」，俱排外檔，或要多耗力跟前，稍為擔心。

第3場　第四班（60-40分）1650米泥地

　　「喜綵」兩仗前三班同程，大半程咬住步速跑，末段仍有唔錯反應，場地性能唔應該唔好。終於落班而轉場地，有心博賠率？！

　　「福到多多」經常喺泥閘試得出色，落場跑則要估，不過，累積減分幾多，唔係冇泥地，唔難上名。「神殿」上賽直路唔只阻到揪咗1次，大敗唔使介意。

　　「精算拍檔」及「白蹄烏」，能力比前幾駒不如，係跑法或排檔形勢才諗。

第5場　第三班（80-60分）1200米泥地

　　「明達」轉場贏到冇對手，時間亦好有說服力，仲係以中磅迎戰，再W。

　　「肥仔糖」唔係一再塞車，上賽唔會跑到冇P，希望隻馬臨場情緒繼續安穩，比賽時唔再黑仔，或可挑戰前駒。

　　「時代明星」以9歲老馬而言，今季尚且在同程有平穩演出，可拖腳。「天賜福星」可以用全程外叠跑法上名，剛賽獲季軍嘅賽績好勁，上班負輕磅兼好位，更有殺傷力。

第6場　第四班（60-40分）1400米草地

　　「多利皇」復出後仗比仗勁，當然，加磅後可會有影響，同埋，以佢路程性能，1600米或比此程更啱，如太熱，博W唔係咁化算。

　　「飛躍之駒」剛勝未必泥地性能好，好大程度係級數，轉番草地仲惡，係睇小吳發揮。「幸運勇士」僅輸頸位畀兩W馬「桂花飄香」，跑出水準，能力值唔會比前兩駒失色。「海王子」重磅及評分嫌高，限爭位置。「信賴」唔係排檔唔好，縮番1400米更具威力。

第7場　第四班（60-40分）1800米草地

　　「中華寶寶」及「飛騰」，上賽都有揀，前駒唔受阻，可以贏到超班咁款，但加磅後要視乎體力及負重能力。後駒大致上跑啱晒而只得P，今仗條件則一得一失（10磅仔但外檔）。

　　「正榮」負磅冇咁重，如又唔使似上場再跑濕地，應有威脅。

　　「奪錶」演出穩定，正路腳。「京城三寶」四班及此程，根本唔使擔心，係驚新勝後心態如何？！

第8場　第一班（110-85分）1200米草地

　　「富貴金龍」冇咗讓磅，未必再有力迫「新力勁」級數，不過，三甲則唔難攞到。「加州財子」準到痺，唔係唔識轉彎，會係前列馬。

　　「步步快」屢在末段以快拉士冚上嚟，要尊重佢近績水平。「傾力之城」今季少跑此程，成績亦普通。「飛闖」上賽跑得差到唔似佢（唔覺係因為出閘曾慢及途中勒避），總之，回到短途，建議拖多次。「風火神駒」和「明燈」，TF冷腳。

第9場　第三班（80-60分）1800米草地

　　「印度光輝」上賽前講過，近仗克服慢步速和外叠蝕嘅不利環境，所以，今場位好及預咗有步速，發揮會仲好。「有盈有利」與「財運」實力及跑法差唔多，均速及跟前走，未必贏得卻易有位置。

　　「神州八號」只因直路冇位，令上賽只得P，要追。「頭盤」目前分數冇優勢，係借助5磅優惠。「馬主光輝」轉場係問題所在，惟睇佢有表現嗰兩場，長直路未必唔掂。

第10場　第三班（80-60分）1400米草地

　　「醒目精英」有冇塞車，上場都未必可追過頭二馬，始終係谷草短直路，而佢當時又耐冇跑。有過1場熱身，回到此程惡得多。

　　「人人醒」初出已揀，賽前只係擔心缺課問題，最終有P算及格，今仗加程會比合適。

　　「快利多」及「豐衣足食」，如賽事形勢因應多馬走而利追，呢對馬最受惠。「進勝福星」要有淋地才有贏面。「最佳孖寶」此程要留得好好至會有上名機會。

第11場　第一班（105-80分）1650米泥地

　　「萬能駒」泥地一哩叻，負磅及檔位又唔差，仍然係爭勝要角。「經典皇牌」唔係排外檔，以上賽初跑此程走勢計，比前駒更有贏面。

　　「幸福紅椒」前仗贏同程造出今季第二快時間，賽績秤先。「伽羅」及「蓬萊仙子」轉泥地，優勢冇谷草咁大。「幸運勁」加程及輕磅有助，當然，近兩仗嘅接近演出亦可取。「齊喝采」情況與前駒近似，超輕磅對此匹泥地性能出色之馬，大大增強能力。

馬會賽馬節目主持　洪禮賢