英女鋒力差獻細

猪拉多纳

01/07/2011
文： 麥馬拿仁

女子世界盃B組分組賽，英格蘭女足鬥新西蘭女足。「女三獅」首仗鬥墨西哥冇甜頭，入波板斧唔多，今仗都係有攻勢難大炒。新西蘭攻力極曳，前線僅得希雅恩衝鋒陷陣，高波咬唔入英軍。拿仁今仗吼細盤，再捧英軍1:0、2:0波膽。 （有線64台周六凌晨零時15分直播）




此組英格蘭同日本被視為出線熱門，但兩軍分組賽首仗都表現一般，英軍鬥墨西哥雖先開紀錄，但被對手轟入「世界波」扳平後，戰情就陷入僵局，墨西哥攻勢相比下更加入肉，「女三獅」同男子國家隊一樣，都係雷聲大雨點小。


熱身賽對戰交白卷


英軍後防不俗，但鋒力真係麻麻，主將姬莉史密芙冇料到，阿魯高等更加有勇無謀，埋門一腳把握力差勁。英軍面對身材矮小、體力不足嘅亞洲球隊或有着數，但新西蘭硬橋硬馬，英軍要入多幾球炒起對手有一定難度。去年熱身賽雙方於中立場交手，都係互交白卷完場，不過英軍為爭出線，今場一定搶攻，以實力衡量應可小勝。




新西蘭被視為此組魚腩，但首戰鬥日本表現唔曳，最後僅失個靚絕罰球輸一比二。新西蘭後防高大有拚勁，但中前場組織、攻力都唔掂，前鋒線僅得希雅恩難破英軍大門，如果今場失波在先相信難有還擊之力。拿仁認為今場細盤好路，另外英軍質素秤先應可小勝，淨勝波膽1:0、2:0亦值得留意。