山度士少3國腳死路一條

猪拉多纳

02/07/2011
文： 牛奶仔

山度士上周贏得南美自由盃後隨即喺聯賽輸波，聽朝出戰巴甲將會繼續缺少3名巴西國腳主力，就算主場出擊亦難以睇好，寧捧阿美利加明尼路2.65倍「讓球客勝」。（開賽時間：周日清晨5:30）




尼馬、甘素同艾蘭奴3名中前場骨幹球員捧完自由盃後，已向巴西國家隊報到備戰美洲國家盃，對山度士整體實力嚟講都咪話影響唔大。上場聯賽喺缺少咗呢3個人，山度士隨即喪師喺新升班球隊費古倫斯腳下。最慘係翼鋒莊拿芬施些路已轉投國際米蘭，後衞里奧又因傷上陣成疑，陣容可以話天殘地缺。


阿美利加明尼路火力強


事實上，山度士由於之前專注爭自由盃，搞到今季出閘脫腳，開季5場聯賽只贏過1場咁大把，搞到跌落降班區域，依家仲要唔齊腳，要反彈似乎未係時機！




另邊廂嘅阿美利加明尼路近期表現亦唔好得幾多，上場慘被法林明高反勝後，就錄得5戰不勝，慶幸佢哋火力素有一定保證，近4場就狂轟入9球，當中大勇嘅進攻中場阿歷辛度紐尼斯就個人包辦咗3球，面對住今季場場有失波嘅山度士都未驚過，受讓下要2.65倍「讓客」。