入股曼聯盞益格拉沙

猪拉多纳

03/07/2011
文： Mic少

近期有消息話曼聯會來香港上市，周圍唔少紅魔fans都興高采烈，事關有機會成為愛隊股東，做埋費格遜及一眾球星嘅老闆。Mic少身為球迷，亦係股民，但一定唔會認購曼聯股份，並非因為憎紅魔，而係唔想荷包縮水。


費Sir隨時退休睇淡前景


眾所周知曼聯負債極高，作為投資對象已經非常高風險，而且足球世界瞬息萬變，充滿不明朗因素，曼聯最大隱憂係費格遜隨時會退休，佢老人家已經六十九歲，幾乎贏盡所有榮譽，連令曼聯超越宿敵利物浦，成為奪得最多英格蘭頂級聯賽冠軍嘅宿願都完成，已有充足引退理由。




曼聯王朝可以長盛，全賴費Sir領導有方，一旦退下，對球隊造成嘅衝擊，實在難以估計，正如若然股神巴菲特百年歸老，投資者仲會唔會追捧其投資旗艦巴郡呢？




曼聯班主格拉沙當年將球會私有化，依家又願意再上市，莫非睇中紅魔球迷對球隊死心塌地，加上「反格拉沙」情緒高漲，更加會大破慳囊搶購，屆時可以抬高發售價，最終受惠都係格拉沙。熱情過後，股價下跌，受害者又係球迷。如果格拉沙真係想靠曼聯賺大錢，不如將球會出售畀卡塔爾等中東財團，無謂畀個氹球迷踩，當做番件好事。