大久保發圍勝利船霸地磐

猪拉多纳

03/07/2011
文： 走肖

鬧你，都係為你好。磐田山葉今晚喺日職主場對神戶勝利船，未必袋得晒3分。事關勝利船近期遇上入球荒後，射手大久保嘉人就嬲到爆，大鬧隊友把握力連高校生都不如，相信會鬧醒番啲隊友，踢爭氣波搶分開1.8倍「讓球客勝」。（now633台周日晚6:00直播）


磐田山葉防線狂失波


計埋日聯盃，山葉近3次主場對勝利船全勝，而且連續兩季成為日職神射手嘅前田遼一，今季都有7個聯賽入球，前鋒山崎亮平同中場山本康裕為日本U22踢完奧運外圍賽後，又已經歸隊可以復出，表面睇的確有優勢，弊在門將川口能活近8場聯賽得2次保持清白，期間狂失10球信唔過！


鬧隊友高校生都不如


對家勝利船近6場聯賽得3和3負，當中得兩個入球，狀態更加曳，不過作為王牌球星嘅大久保嘉人，曾經喺對鹿島鹿角輸波後鬧隊友把握力差過高校生，結果跟手勝利船作客以1:1打和大宮松鼠，入波由佢自己親自搞掂，最後打和執1分，證明經佢鬧過後，全隊士氣冇下降，反而肯踢爭氣波畀人睇添。




其實勝利船最近有前鋒都倉賢傷埋，造成前線牌面更弱，但實際上佢今季得2個聯賽入球，缺陣可能係好事都未定，容易造就其他隊友上位，好似18歲中場小川慶治朗，賽前話自細就好崇拜山葉門將川口能活，希望今場入波向偶像致敬，咁有衝勁同鬥心，聽完大久保嘉人發火，嚟料唔出奇架。