高清睇跑馬：叻叻仔增程有根據

猪拉多纳

　　「叻叻仔」六十五分首戰唔跑三班，吼準高分四班賽上陣，部署落足心思，可惜鞍上人係勞愛德，此君騎負重磅馬絕少有表現，此駒該役孭咁多鉛，仲要留前鬥後，絕不樂觀，然而結果令人喜出望外，爆冷闖入季軍，並且同之後補中的「威利高」齊齊過終點，成績絕對了不起。接戰上番三班跑，步速太慢後上不及理所當然，至於上仗，由1400米縮落1200米，仲要初跑谷草，試兵心態落敗不用上心，兼且該仗沿途走三叠冇遮檔，依然追到第五相當厲害。周三一戰，此駒改攻1650米有好冇壞，事關牠於外地跑2000米曾獲冠亞季各一，足證愈長愈好，加上今場對手缺點多多，值得一捧。

　　另外，「一定爆」初出即勝質素高，接戰失準跑尾二，純粹因首次負重磅未習慣，唞了一個月做足特訓，初跑谷草負132磅照用巫斯義，信心十足，結果不負所托贏夠兩個多身位，極之誇張。接戰升班續爭同程跑第二，頭馬「科研精英」畀佢大一歲，又連贏兩場三班賽，「一定爆」僅以頸位飲恨雖敗猶榮。之後唔跑1000米改攻1200米，大前仗初跑黏地輕勝，前仗首戰泥地又贏，唔好忘記，泥地一役牠既挫下六戰同程未失Q的「大把在手」，又跑出今季泥地1200米第二快時間1.08.45。

　　牠上仗失準，全因初跑1400米未夠長力，今次跑番勝途谷草1200米，既路合，跑法又夠進取，不勝有位。

Sam