德女冇霸氣難o趙法蘭西

猪拉多纳

05/07/2011
文： 亨格比利

女子世盃今晚激戰連場，已躋身8強嘅德國同法國合演A組榜首大戰。法國由外圍賽起一直保持高水準演出，一條銅牆鐵壁防線係致勝關鍵，對住毫無霸氣嘅東道主德國冇有怕，2.65倍「讓客」夠晒分頭。（有線61及64、中央5台周三凌晨2:45直播）




雙方喺A組都係兩戰全勝提早出線，由於法國得失球差較佳，今仗唔輸就可首名晉級。呢場波喺慕遜加柏嘅保路西亞公園球場舉行，當地傳媒估計會有5萬球迷觀戰，東道主德國固然係焦點，不過法國呢期亦都備受注目。事關佢哋上仗大炒加拿大之後，幾位國腳即刻拍咗輯全裸寫真，以「係咪要我哋剝光豬，你哋先入場睇波？」作口號，據講呢招好Work，唔少球迷都讚班法國女將靚女添！




德國呢邊，賽前有拜仁守將拿姆幫手打氣，呢位德國男足隊長預祝女足捧盃，彌補「日耳曼兵團」失落06世盃嘅傷痛。講就容易，有睇上輪分組賽嘅朋友，都見德國贏尼日利亞贏得幾險，缺乏一種地膽嘅霸氣。


法國外圍賽起保持長勝


被德國《圖片報》稱為「女版波歷克」嘅佩蓮絲，狀態同波歷克一樣咁低迷，連續兩場踢唔足全場，上仗被調走後仲發老脾，最弊係另一射手格寧絲上仗傷出，今鋪未必可以候命，領隊妮特都幾頭痕。要知道法國喺外圍賽10戰全勝之餘，仲場場保持清白之身，頭兩輪分組賽亦冇失波，要頂住冇牙老虎德國唔難吖！