洪禮賢講馬：活力至寶一定爆大把在手特好

猪拉多纳

　　雖然係谷草A欄賽事，但去到季末，跑法及檔位所佔比重較大，尤其係排檔，剩係睇對上3期A欄賽日，有6成以上頭馬排1至4檔，便知內檔優勢有幾大。

重心場次：第7場　第二班（100-80分）1200米

　　「活力至寶」三升二班首戰，排檔亦略有風險，可能會降低能力值。之不過，上賽頭馬好值得「歌頌」，二至四名統統係新勝或翌仗即勝之馬，但一對住佢俱冇運行，當然，隻馬嘅穩定表現都係賣點。

　　「一定爆」加程撞板後即縮槓，處理實際，排3檔則要視乎與「大把在手」早段點互動；後駒以準字打拼，惟雙重加磅最多P望。「自由勝」前仗拖慢嚟贏唔算出色，但因今場馬少T腳可諗。「特好」輕磅、好位、重戴眼罩，俱為利好因素。「風雲勇子」前仗造出今季最快時間贏谷草1000米，睇嚟發展空間比此程大。「清風送爽」二班略下風，爭位居多。

重心場次：第8場　第二班（100-75分）1800米

　　「活出美麗」早於外地第2仗已戴罩，今仗肯加，而賽前有大閘試埋，做法夠細心。對比起近兩賽表現，上場明顯規矩咗好多，末段更展示夠韌嘅優點，有理由相信跑更長路程，發揮會仲好。

　　「千杯不醉」與「易搏贏」剛同場，後駒明顯錯用戰略，都係輸少少畀前駒，彼此今場如用啱跑法，後駒會叻好多。「四季」轉跑法及場地，一樣喺上場「輕鬆」入到前五名，好有跟進價值。「喜蓮智星」及「勁高手」往績準，評分就差唔多爆標，爭三三四四。

　　「怡勝」無疑遇上近仗中較弱的對手，但佢季內明顯唔夠銳，希望爭到前幾名。