國體會主場鑊氣勁

猪拉多纳

06/07/2011
文： ComboKing

周中巴甲開快車，主力同大家研究國際體育會主場迎戰帕拉尼恩斯。近期國體會可用殺得性起來形容，今仗有埋主場之利惡氣十足，有力大炒帕拉尼恩斯，2.05倍「讓球主勝」值得考慮。




（周四早上6時30分開賽）




國體會於巴甲連勝費古倫斯及明尼路，兩場比賽均四度破門，今季已曾三度喺聯賽中取得四個入球，亦係暫時巴甲入球最多球隊，攻力相當有保證。值得留意巴西小國腳奧斯卡杜斯山度士，呢位九十後球員之前効力聖保羅時已受矚目，轉投國體會後表現更搶鏡，今場再取入球唔出奇。




榜尾帕拉尼恩斯踢過七場聯賽仍未「開齋」，僅得一分，聯賽作客更全數落敗，賽績與國體會天淵之別。而帕拉尼恩斯近六次作客國體會亦僅獲一和，其餘五場全敗，客隊太過弱勢，今場好難偷到雞。


艾華爾讓唔起巴希亞


另外，艾華爾主場對巴希亞，「讓球客勝」可以一試。艾華爾喺聯賽仲未識贏，要讓巴希亞就唔抵玩，話晒巴希亞近兩次作客皆勝出，受讓梗係揸得過。




最後高士路主場對甘美奧，主Ｗ熱透可望順利開出。甘美奧近況相當低沉，最近一次贏波已經係六月初，高士路有主場之利，本身亦有兩連勝氣勢支持，相信唔會令大家失望。