巴西o靚星難捉圭

猪拉多纳

09/07/2011
文： 樂比堅尼

美洲國家盃周日凌晨上演兩場B組分組賽，重頭戲係雙巴大戰，巴西對巴拉圭。今屆美洲盃爆到七彩，截稿前八場分組賽得一場開上盤，仲要得半格，問你服未！咪以為踢第二輪就會轉攤路，呢支年輕巴西隊欠缺火候，對住大熟大勇嘅巴拉圭，隨時踢到老鼠拉龜，樂比捧2.2倍巴拉圭「讓球客勝」！（有線61及201台周日凌晨3時直播）


攻擊鐵三角未執掂


美洲盃踢咗個多星期，有人話南美足球再無魚腩，各隊實力非常接近，但樂比仔卻認為只係巴西同阿根廷兩支勁旅踢唔出本身最佳水平，其中以巴西為甚，佢哋今次美洲盃罕有地強陣應戰，但部分球員經過漫長歐洲聯賽球季，根本唔處於最佳狀態，好似攻擊鐵三角之一羅賓奴上場就踢到冇晒影，領隊文奴文尼斯坦言今場可能會收起佢。




事實上，巴西今次大軍欠孭飛球星，文奴文尼斯以兩名新星甘素及尼馬為重心實在太冒險，兩位山度士球員潛質確係優厚，但要肩負起國家隊領軍重任似乎太早，從上仗所見兩人落力有餘，但未見有任何建樹，計樂比仔話齋，出番艾蘭奴、費特等具經驗球員效果隨時更佳！


巴拉圭擅穩守突擊


巴拉圭以去年世界盃打入八強陣容為班底，主力均處於當打之年，而且球員默契成熟，踢落較巴西更有隊形，首仗對厄瓜多爾雖然打和○比○，但巴拉圭係表現較佳及射門較多一隊，兼且佢哋一向係擅踢穩守突擊球隊，上場對厄瓜多爾踢上風波唔啱佢哋，但今場對巴西做underdog，效果分分鐘仲好，「讓球客勝」有2.2倍值博率甚高！