高士路受讓執到保

猪拉多纳

09/07/2011
文： ComboKing

美洲國家盃雖然進行得如火如荼，不過巴甲一樣有波踢，所以大家揀波時一定要睇清楚有冇主力缺陣。好似聖保羅自從中場靈魂盧卡斯洛迪古斯出戰美洲盃後，成績每況愈下，周中仲炒埋教練卡佩基亞尼，今輪主場鬥高士路未係時候反彈，「讓球客勝」可作為過關重心。（周日清晨5時30分開賽）


聖保羅「新卡卡」缺陣


聖保羅經過季初五連勝，近三場聯賽突然走晒樣，先後不敵哥連泰斯、保地花高、法林明高，最慘仲要零入球，球會周中決定炒掉教練卡佩基亞尼，由米爾頓告魯斯出任暫代教練，希望可有一番新氣象，不過球隊表現差未必和此有關，反而中場盧卡斯洛迪古斯缺陣影響仲大。呢名有「新卡卡」之稱嘅後生仔只有18歲，但助攻助守表現搶鏡，能夠入選大國腳出戰美洲盃，卡士當然有番咁上下，聖保羅中場冇咗佢可謂潰不成軍。




對手高士路近況剛好相反，自從上月尾於主場擊敗哥列迪巴，聯賽已保持三連勝，而且對上兩場都冇失波，攻守都有保證，今晚遇着病貓聖保羅可保不敗，捧「讓球客勝」。




卡爾馬作客反轉特利堡




另一場瑞典超特利堡主場鬥卡爾馬，兩軍上周首循環交手，卡爾馬主場贏三比二，但其實卡爾馬上半場早早領先三粒，如非比賽末段有球員被逐，比數唔會拉得咁近。特利堡七連敗愈踢愈沉，主場出擊都信唔過，捧客勝。最後挪超洛辛堡主場鬥史卓加斯特，洛辛堡近期演出重拾霸氣，史軍近兩季作客此地都淨吞三蛋，今次難破宿命。