委內瑞拉進步大把厄力強

猪拉多纳

09/07/2011
文： 力奇

B組首輪兩場和晒，家陣世界大亂，隊隊都有機會出線。之前被睇低一線嘅委內瑞拉同厄瓜多爾，聽朝碰頭贏波嗰隊，幾乎半隻腳踩入半準決賽，鬥志方面大家都冇疑問，只係厄瓜多爾陣內首席球星路爾斯華倫西亞有傷在身，未必踢得，戰鬥力大減下仲要讓波，我寧願捧近年進步神速嘅委內瑞拉，要1.57倍「讓球主勝」。（有線61及201周日清晨5:30直播）




首戰爆冷守和巴西嘅委內瑞拉，近年整體足球水平明顯大幅提升，世界排名由以往低至120位，到家陣升到上69位，只係僅較厄瓜多爾低1位。呢班波近年出產唔少具質素嘅球星，能夠立足喺歐洲頂級聯賽，由艾蘭高、湯馬士連干同荷西朗頓組成嘅進攻鐵三角，威脅力唔細，今仗值得寄予厚望。防守方面，上仗既然連巴西都守得住，又點會驚厄瓜多爾呢？


厄瓜多爾華倫西亞打柴


另邊廂，首戰同巴拉圭互交白卷嘅厄瓜多爾，今仗有路爾斯華倫西亞上陣成疑，呢位曼聯球星上仗觸傷之前斷腳嘅左腳足踝部位，今次要做埋體測先知落唔落得場，缺少咗佢嘅突破能力，單靠賓尼達斯同卡些度喺前線亂衝亂撞，真係冇乜本錢入波。最後睇埋兩軍對賽，近4次交手委內瑞拉錄得3勝1負，連對賽都佔優，受讓抵玩！