棟悉先機：進攻足球田草破網

猪拉多纳

　　馬季過得真係快，又要同大家講BYE BYE。阿棟好開心今季可以喺《成報》同大家交流賽馬心得，咁呀，禮多人不怪，喺度感謝支持過我嘅讀者們，希望你哋喺暑假生活愉快，更重要梗係今日贏個痛快！有緣的話，希望來季會喺度再同大家見面。

　　第四場第四班1600米。唔認為「進攻足球」有過人之質，充其量係四班有得贏之流，除非轉4歲會有大幅度進步則作別論。而睇過之前谷草表現，兩場跑得冇錯之下仍位置不保，谷草唔慌係佢將來出路，所以，立心再跑田草係正路。實在之前跑過幾場此程，演出穩陣到不得了，如果唔係對住超班馬，如上賽嘅「喜運財星」，佢一定有得爭。今場主要對手應該係初跑此程嘅「桂花飄香」，但後駒冇此程經驗，末段如彼此鬥檻，可能蝕啲。

勝利之星賽績出色

　　第七場第三班1600米。「勝利之星」兩出得1W1Q，賽績出色，大摩呢類自購馬，如果一早就有好表現，展望通常可坐二望一（班）。上賽雖然只係壓倒三班中下級嘅「進勝福星」，由於過程輕鬆，加8分真係「嫌少」。目前喺原班只多負3磅，着數到咁，大摩有便宜唔使洗頸，點會唔搏埋今場。

　　第九場第三班1400米。阿棟都唔只1次品題「醒目精英」，無他嘅，隻馬有前景又年青，追住買好正常。上賽係休後復出第2仗，一跑番1400米就贏，對手已經係後勁強見稱嘅「快利多」及「豐衣足食」，末段起勢係咁追又點，一樣係唔夠佢衝，贏得清脆利落。而今場對手亦唔見得比剛仗有何分別，有力再下一城。

點買法

　　煞科賽但求穩健，提供兩W都係大摩，「勝利之星」和「醒目精英」，分頭有限，希望中晒，攞番個尾彩。而重心QT場次，一於吼第七場，配腳有冷有熱如１、３、６、７、１３。再祝大家行尾運！

資深評馬人　陳華棟