巴西美國細均力敵

猪拉多纳

10/07/2011
文： Mic少

女子世界盃八強大戰，巴西女足對美國女足，「森巴女將」今屆演出搶鏡，分組賽三戰全勝兼冇失波，但來到淘汰賽，情況將完全唔同，因為每場都係生死戰，心理壓力較大，踢法難免會傾向保守。美國氣勢雖不及對手，但經驗搭夠，今場高手過招勢均力敵，隨時一球定勝負，捧入球細最穩陣。




（有線61及64台周日晚11時30分直播）




巴西女足踢法確實賞心悅目，瑪達盤扭突破，伊歷卡嘅精彩射門，真係令人拍爛手掌，某程度上仲好睇過踢緊美洲國家盃嘅男足。不過「森巴女將」今場仲會唔會繼續踢得咁瀟灑，令人好懷疑，事關來到淘汰賽階段，稍有閃失就要執包袱，採取穩陣戰術先至係上策。




其實巴西喺以往女子世盃都有上佳演出，但偏偏與冠軍無緣，就係唔熟悉淘汰賽玩法，相信球隊吸取過去經驗教訓之後，應會改變思維，唔會太冒進，尤其係美國屬於女足勁旅，「森巴女將」更加會打醒十二分精神，以免被對手偷襲。


美國一味夠穩


美國隊今屆走勢不如對手凌厲，但佢哋喺過去五屆女子世盃，最低限度都可以打入四強，水準非常穩定，而且踢法上格食格剋住巴西，雙方近四次對壘，美國取得三勝一和，三場勝仗都係贏一比○，另一場九十分鐘互交白卷，證明強隊交手，往往緊張而不精彩，預料入波數字唔會多。勝負關鍵可能在於邊隊先犯錯，無謂左度右度，直取入球細啱數。