巴西公主降服美女

猪拉多纳

10/07/2011
文： 牛奶仔

今晚女子世界盃8強上演矚目大戰，巴西會同另一熱門美國爭出線，呢場除咗係近兩屆奧運決賽翻版，更被視為係瑪達同蘇露了斷恩怨嘅對決。巴西女足喺人腳同氣勢都佔優，牛奶仔撐瑪達上演「公主復仇記」，帶領「無冕之后」巴西殺入準決賽，要2.5倍主W！（有線61及64、中央5台周日晚11:30直播）




世界排名第3嘅巴西同世界一姐美國積怨甚深，喺04年奧運決賽巴西加時輸畀美國屈居亞軍，3年後巴西喺世盃準決賽大炒美國4:0成功報仇，但喺決賽輸畀德國未能捧得第一座大賽獎盃。到咗08年京奧，女足決賽又由巴西鬥美國，但巴西再次喺加時輸波同金牌擦身而過。唔單止咁，巴西女足有史以嚟輸得最慘烈一戰，正正就係作客畀美國大炒6蛋，話今場唔想復仇就假！


瑪達入波助攻瓣瓣掂


近5屆世界足球小姐瑪達喺當年北京奧運狀態大勇，但美國門將蘇露喺決賽突然「上身」，作出多次經典撲救，令平均喺國家隊唔使1場就入1球嘅瑪達慘食白果。因此，世界各地傳媒紛紛將今場視為瑪達同蘇露二人嘅對決，更加係瑪達嘅復仇之戰。




上屆世盃神射手兼MVP得主瑪達，喺今屆世盃一改以往踢法，多咗與隊友配合同分波，將入球責任分散。巴西今屆3場分組賽入7球兼冇失過波，當中瑪達佔咗2球，同時錄得2次助攻，令對手難以防範，連美國隊長拉姆邦妮都大讚瑪達：「佢速度同創造力都非常高，完全唔怕任何人，實在係不可思議。」


美國雙將帶傷出戰


美國上場畀瑞典技術性擊倒，只以小組次名出線，士氣受到打擊。該場入波功臣雲芭芝，將聯同上場因傷避戰嘅中場奧蕾莉雙雙帶傷出戰。美國剛被打窒士氣，就要立即對住如日中天嘅巴西，睇怕都要寄望門神蘇露再次「上身」先得啦，但會唔會有啲不切實際呢？


巴西女足5連勝


‧今屆世盃3戰全勝，入7球兼未失球。

‧近5場比賽全勝。

美女近戰旺開細

‧近6場比賽5場開入球細。

‧近4次交手均開出入球細。