敲阿根廷僅熟出線

猪拉多纳

11/07/2011
文： 麥馬拿仁

美洲國家盃A組出線生死戰，阿根廷主場鬥哥斯達黎加。論牌面同實力，「藍白兵團」起碼高對手兩皮，但現時陣營士氣曳壓力大，美斯態沉又缺支援、領隊巴迪斯達亦冇乜計，要大炒對手冇咁易。始終哥軍戰鬥力差，信阿根廷破釜沉舟出線，但估計僅熟贏波，捧「讓球和」啱數！（有線61台周二早上8時45分直播）


主場再唔贏難交代


阿根廷雖係東道主，不過兩場分組賽表現令人極度失望，陣中球星如雲，美斯、泰維斯、馬斯真蘭奴、拿維斯等全部落齊，但整體演出卻如一盤散沙，首兩仗僅能逼和玻利維亞同哥倫比亞，被國內傳媒口誅筆伐。目前「藍白兵團」僅得兩分，而哥倫比亞及哥斯達黎加分別有4同3分，雖然兩支最佳成績第3名球隊亦能晉級，但阿根廷肯定唔想咁冇面，以其強大陣容，拿仁深信佢哋可以贏番場，只係好難大炒對手。




阿根廷大營目前確係面對好多問題，預計巴帥今仗或會排出4-2-3-1陣式出擊，以希古恩正選掛帥，而拿維斯將被棄用。另阿古路首仗後備落場表現對辦，必要時放佢落場可以幫到手。至於美斯同泰維斯雖然齊齊缺態，但畢竟二人級數高，隨時有爆發可能。


哥斯達黎加輸質素


哥斯達黎加今次以大批年輕球員應戰，但踢落鬥心十足，不過始終質素所限，要逼和阿根廷好難。預料主隊一開波就全力搶攻，但以阿根廷目前狀態，要於早段入波有難度，而入波後球隊求勝心切，或會患得患失，而踢得較保守贏波就算。今場主W得1.09倍，「讓球主勝」亦僅得1.48倍，投X價值唔高，綜合形勢下不如捧「讓球和」。