施洛雲執到保

猪拉多纳

12/07/2011
文： 麥馬拿仁

歐聯外圍賽第二圈首回合，應屆斯洛伐克「雙冠王」施洛雲，主場鬥哈薩克球隊杜保爾。主隊近廿五場正式賽事不敗，今夏又成功留住首席射手施保，積極擴軍下目標直指歐聯分組賽，為免次回合舟車勞頓影響表現，今次趁主場必盡數，捧1.72倍「讓球主勝」！（周三凌晨２時15分開賽）




自去年十月尾開始，施洛雲保持聯賽及盃賽共廿五場賽事不敗，最終勇奪聯賽及斯洛伐克盃冠軍。班主克莫卓克雄心萬丈，先承諾會興建新球場，再向神射手施保大幅加薪，以免佢被漢諾威撬走，之後更買入布拉格斯巴達防中卡拿特洛斯基，誓要力爭歐聯分組賽資格。施洛雲陣中有多名斯洛伐克國腳，以波論波高過對手起碼一班。




杜保爾大跌Watt




杜保爾上季雖稱霸哈薩克聯賽，但本季卻跌晒Watt，現僅列第七位，其中作客尤其差勁，十戰只得兩勝兩和六負，今次去到斯洛伐克肯定捱打。另外，施洛雲教練查洛林表示，今次抽正杜保爾次回合要作客哈薩克，從地理角度上係「極唔好彩」，可見佢都擔心遠征會影響球隊發揮，故今戰肯定數得就數，唔使擔心佢哋揸流攤小勝就算。