兵工廠備戰差支持「馬國明」

猪拉多纳

13/07/2011
文： 朱楓

阿仙奴近排因隊中球星相繼被撬，大大影響備戰工作，今晚喺亞洲之旅首站迎戰馬來西亞明星隊，隨時失威都唔奇，畢竟馬來西亞近排嚴打假波，球員為洗嫌疑，唔搏命就假，絕對有機開出「讓球主勝」！（now632台周三晚8:45直播）


馬來西亞打假實搏命


一向嫌遠唔去亞洲備戰嘅阿仙奴，今季終於抵受唔住金錢誘惑，東行踢2場熱身賽。不過兵工廠近幾個月，一直受法比加斯同拿斯尼兩大主力被挖新聞困擾，最終法比仔亦聲稱有傷缺席今次23人大軍。雖然雲格尋日喺吉隆坡接受訪問時，第一次講明只要法比仔認留隊唔開心嘅話，佢一定放人，但就強調一定要價錢啱至得。




睇番阿仙奴今次23人大軍，前鋒賓特拿同門將艾蒙尼亞由於即將離隊缺陣，啱啱簽入嘅謝雲奴亦因簽證問題冇隨隊，而獲雲格大讚嘅後衞贊堅臣同翼鋒宮市亮兩位新兵好大機會擔正，但兩人始終加盟無耐，落到場幫唔幫到手絕對成疑。




馬來西亞明星隊當然係由効力馬國聯賽一班球星組成，「馬國明」自74年至今只錄得1勝3和11負，但唯一一場勝仗就係喺75年贏阿仙奴。況且馬來西亞近排嚴打假波，日前就捉咗兩位頂級球隊教練，盛傳每年打假波金額高達42億鎊，為免瓜田李下，相信「馬國明」今晚一定唔敢揸流攤，絕對有機製造爆冷戰果o架！