鯨魚得水鹿角有排衰

猪拉多纳

13/07/2011
文： 九叔

乜嘢叫如魚得水？睇吓今晚場日職名古屋鯨魚主場對鹿島鹿角就知道嘞！呢支上屆冠軍近期回勇，仲同名古屋港水族館合作谷人氣，可以話如魚得水，有本錢收拾狀態低迷嘅鹿角，小讓平半好抵博。（開賽時間：周三晚6:00）




鯨魚季初本來都表現唔好，但係自從响亞冠盃輸畀水原藍翼，唔使兼顧咁多瓣之後馬上反彈，喺日職8戰不敗，排名由12位跳上第7，成班球員信心返晒嚟。為咗谷行主場人氣，鯨魚由今日開始，仲同名古屋港水族館合作搞有獎遊戲，到10月10號前所有主場賽事，觀戰球迷可以用波飛或者水族館入場券飛尾參加抽獎，獎品除咗乜嘢簽名T恤，自然唔少得送波飛，希望靠咁樣互動提高入場率，壯大主場聲勢。




反而鹿角就慘嘞，近8場波只贏過3場，排名落到去第13，最弊係班主力狀態麻麻，上場輸畀新潟天鵝1:2之後，已經傳出佢哋今仗可能大幅變陣，小笠原滿男、大迫勇也甚至卡比奧有冇得做正選都未知。而且後衞伊野波雅彥去咗克羅地亞加盟夏德，中場柴崎岳又右腳骨折，可資利用嘅兵源減少咗，形勢幾不利吓。


櫻花磐田大廝殺


當然，鯨魚近3年主場都未贏過鹿角，頭號龍門楢崎正剛又手指骨折有排抖，坐底休息4個禮拜，不過寧買當頭起，鯨魚走勢咁順，小讓平半冇理由唔買上盤。




不過講到今日啲日職，大阪櫻花對磐田山葉個入球大可能仲好玩，事關呢兩隊交手開大比率高達6成，近3年對碰未試過冇交收，1.85倍入球大值得買番啲。（now634台周三晚6:00直播）