日本女足恰慣瑞典

猪拉多纳

13/07/2011
文： 走肖

東道主德國女足都贏埋，日本女足已經證明唔怕「空中戰」，高度、體形蝕底完全唔係問題，今晚日本女足喺4強對瑞典女足，2.7倍主W值得再追，特別係近4次對賽日本女足未輸過，為咗達成「世界一」（世界第一）目標，肯定會諗辦法贏埋呢場至算。（有線61及64、中央5台周四凌晨2:45直播）




其實今屆比賽開幕前，日本女足已打正旗號話要超越08年京奧足球賽殿軍成績，即係要首次獲得女子世盃獎牌，勢估唔到，依家佢哋真係殺入4強，仲喺8強加時以1:0砌低連續兩屆冠軍的德國女足，即使隊長澤穗希近排受到腰傷困擾，超新星岩淵真奈上場波又畀人踢親，計落呢場始終抵捧啲。


近4次碰頭2勝2和


點解咁講？德國女足平均身高1米73，日本女足平均身高得1米63，但從上場交手所見，東瀛女將一啲都唔驚「空中戰」，教頭佐佐木則夫更加大爆，為咗應付高大對手，佢安排咗好多熱身賽針對性試陣，當中今年就試過兩次約戰瑞典女足，結果拎到1勝1和，04年至今4次對賽有2勝2和，至低限度，佐佐木則夫唔怕對手用高度屈機。




再講，瑞典女足比起德國女足，身材唔算特別高大，射手舒蓮1米79係難搞啲，但佢似乎唔擅長「空中戰」，把握能力亦普通，加上連續3場入波嘅達姬絲都係用腳多過用頭，分組賽入過波嘅中場菲絲查要坐波監，唔容易扭轉被恰死嘅命運。