美國抗疲有「法」W得

猪拉多纳

13/07/2011
文： 安高

4強大戰，經驗重於一切！喺女子世盃8強戰驚險淘汰巴西嘅美國女足，嚟到今晚準決賽，會遇上首度躋身4強嘅法國女足，安高信得過佢哋較佳嘅大賽經驗，加上「抗疲3招」能夠戰勝體能問題，取得最後勝利，今場一於捧1.75倍客勝。（有線61及64、中央5台周四凌晨0:00直播）


沖凍水涼按摩着超緊拉筋褲


美國女足上輪苦戰120分鐘同奪標大熱巴西打和2:2，最後憑互射12碼先贏波晉級，士氣肯定好到冇朋友。雖則話佢哋相較法國會少1日休息，仲要係今屆賽事平均年齡最大一隊，不過安高知道佢哋個隨隊體能訓練師一早畀定「抗疲3招」佢哋，即係要沖凍水涼、做按摩同着住超緊拉筋褲出入，有望及時回復體能出賽。




事實上，話晒美國女足都係兩屆世盃冠軍，大賽經驗優勝，好似射手雲芭芝同門將蘇露，無論喺任何時刻都係信得過之人，雖則話中場保娜今仗停賽，預計都會有足夠替補。




法國分組賽面對德國女足輸2:4，距離一線勁旅仲差一截，就算話今仗佢哋會有正選門將莉普域絲復出，中場又有「女版施丹」妮絲比孭飛，面對硬仗都仲係輸蝕。