巴西還原雙箭頭搶錢

猪拉多纳

13/07/2011
文： 牛奶仔

聽朝美洲盃上演B組最後一輪分組賽，表現一直未如理想嘅巴西，將會還原傳統442陣式盡力一搏，今仗一於捧佢哋知恥近乎勇，大勝厄瓜多爾進身8強，以正「足球王國」威名，1.82倍「讓球主勝」啱晒用嚟搶錢！（有線61、64、201、203及中央5台周四早上8:45直播）




上屆美洲盃冠軍巴西上場以謝臣代替羅賓奴打正選，以4231陣式應戰，雖然前者不負眾望為巴西先開紀錄，但後來竟畀巴拉圭連入兩球後，最終森巴兵團換入盧卡斯洛迪古斯同費特改踢442，即刻成班波生番晒，成功保番一分。比賽期間竟有球迷舉出標語，要求領隊文奴文尼斯徵召女球王瑪達入伍，擺明寸班森巴兵連女足都不如，正所謂趕狗入窮巷，巴西一班球員畀人踩到上心口，戰意絕對爆燈！




初段擔任單箭頭嘅柏圖，以及名將艾迪亞，賽後雙雙指文奴文尼斯應該踢雙箭頭，預料文帥今場將順應民意返璞歸真，繼續收起羅賓奴，以柏圖及尼馬任雙箭頭。


厄瓜多爾華倫西亞養傷


厄瓜多爾暫時1和1負兼未入過波，依家排喺B組榜尾，今場和波都肯定出局，呢支高原「地頭龍」喺今屆阿根廷美洲盃跌Watt指數仲勁過對家巴西，喺曼聯踢到曉飛嘅主將路爾斯華倫西亞於首戰隱晒形，上場更因傷踢唔到，預料今仗都未必踢得，大有機會連續3場分組賽食白果出局。