德乙勁爆開騷

猪拉多纳

14/07/2011


新一季德乙聯賽將於香港時間周六凌晨零時開鑼！今季水平堪稱歷年之冠，三支升班馬布倫瑞克、羅斯托克及特雷斯登，皆屬歷史悠久及具規模老牌球會，最重要係擁有大量忠心fans支持，主場入座率奇高，加上由德甲降班嘅法蘭克福，可以同FSV合演打吡大戰，令德乙大「升呢」。




低組別聯賽由於戲碼弱，一般較被忽視，但今季德乙隨着布倫瑞克、羅斯托克及特雷斯登加入，即時令號召力大增。可能大家對呢三隊唔多熟悉，但其實佢哋喺德國本土擁有大量球迷，即使上季踢德丙，但主場入座人數高企，冠軍布倫瑞克平均每場有一萬七千人捧場，而羅斯托克及特雷斯登亦錄得一萬四千人。反觀，上季德乙包尾三隊，奧斯納貝克、奧柏侯遜及比勒費爾德平均每場只有六千至一萬人入場，高下立見。


三支升班分子都猛料


今季三支升班馬之所以備受歡迎，好大程度同球會背景有關，布倫瑞克已有一百一十六年歷史，比拜仁慕尼黑更早成立，被譽為德國足球「活化石」，建立深厚球迷根基。至於羅斯托克及特雷斯登同屬前東德球隊，由於德國統一後，球壇由西德球隊主導，因而加強東德球隊凝聚力，希望出人頭地，球迷忠誠度特別高，其中羅斯托克曾多次出戰德甲，成為東德足球代表，擁有特殊地位。




羅斯托克自知身負重任，積極招兵買馬增強實力，包括簽下曾於德甲打滾多年嘅斯洛伐克射手文度，仲有前雲達不來梅中場柏夫爾，衝擊德甲席位。