施拉斯克雙塔喪轟登地聯

猪拉多纳

14/07/2011
文： 力奇

歐霸盃外圍賽次圈今晚惡戰連場，其中來自波蘭嘅施拉斯克喺主場迎戰蘇格蘭嘅登地聯，咪以為主隊冇乜名氣就係流料，查實呢支波甲亞軍實力唔簡單，今夏仲由荷蘭搵嚟巨人中鋒禾斯金，同陣內阿根廷仔奧馬戴亞斯組成雙塔陣，今晚喪轟有中堅加利堅尼夫缺陣嘅登地聯，自然勝券在握，1.57倍主勝穩陣啦！（開賽時間：周四晚10:45）




施拉斯克係上季波甲亞軍，陣內波蘭國腳如雲，隊長美拿正係其中之一。球隊今夏為求增強實力，由荷乙鹿特丹斯巴達搵嚟身高達6呎4吋嘅巨人中鋒禾斯金，此子上季為球隊上陣31場就入29球之多，仲試過單場入8球，入球能力驚人，由佢配合都有6呎身高嘅奧馬戴亞斯，話之你登地聯踢慣高Q大棍都冇有怕。


葛維尼惹官非無心機踢


登地聯呢邊，首席前鋒葛維尼既有官非纏身，又搞緊轉會，邊度可以專心應戰吖？最慘係球隊傷兵唔少，中場丹尼史雲遜、後衞史葛羅拔臣同加利堅尼夫都因傷缺陣，實力削弱唔少。雖則話佢哋領隊彼德侯斯頓賽前睇過施拉斯克DVD，深知主隊高波唔易頂，但殘陣出擊，想守住都有心無力啦！