格雷特霍夫響頭炮冇蘭度

猪拉多纳

15/07/2011
文： 朱楓

德乙今晚開鑼啦！焦點落喺格雷特霍夫主場對法蘭克福呢場壓軸大戰。雖話法蘭克福被視為今季升班大熱，但查實格雷特霍夫實力唔曳，預計喺全場坐爆情況下，有力打響頭炮，平手盤值得秤先！（開賽時間：周六凌晨2:30）


法蘭克福查維拿斯缺陣


法蘭克福今季雖降落乙組，但總算保留射手基卡斯等主力。近日傳媒訪問德乙18支球隊教練，結果得出法蘭克福同波琴係升班大熱。其實法蘭克福今季野心幾大，一早投資150萬歐元簽新教練艾明費同球員，預算今季總支出達1,900萬歐元，難怪隊長派文舒維加近日表示，覺得球隊今季整體實力比上季仲要好，不過希臘後防大將查維拿斯近日盛傳將轉會奧林比亞高斯，今場或會缺陣，對班波嘅防守力點都有啲影響。




至於格雷特霍夫上季喺前史浩克助教巴斯堅斯調教下，表現穩定咗好多，並以殿軍衝線，取得自97年升上德乙以嚟最佳成績。由於戰績好，格雷特霍夫今季破球會紀錄賣出3,000套季票，日前喺一場熱身賽更以17:0大勝對手，難怪被視為今季爭標最大奇兵，預計今晚首度喺主場出擊，好大機會坐爆，隨時畀到驚喜大家！