杭州大宴兵工廠

猪拉多纳

16/07/2011
文： 邪神

阿仙奴展開十六年來首個亞洲之旅，周三在吉隆坡亮相即以四比○大炒主隊馬來西亞明星隊，贏波過程非常輕鬆，「兵工廠」轉程到中國杭州，今晚出戰FC杭州，雙方實力本來已經有距離，主隊兩位國腳杜威同榮昊參加國家隊集訓缺陣，預期阿仙奴可大勝，入球大同「讓球客勝」都係心水。（now 632周六晚7時30分直播）




上有天堂，下有蘇杭，邪神近年雲遊四海，今次阿仙奴到訪杭州，適逢其會現場睇波，今場客串寫波幫大家目及清楚。杭州睇波風氣甚為熾熱，兩年前曼聯到訪當地大收旺場，當年嘅比數好誇張，曼聯以八比二大炒杭州，球迷睇入波睇到飽，亦可見FC杭州實在深明「待客之道」。


阿仙奴落足力娛賓


上次辦得成功，主辦單位今次添食，請嚟十六年從未到訪亞洲嘅阿仙奴，淨係新鮮感都爆錶，阿仙奴喺馬國站已顯示佢哋嘅比賽態度有幾認真，雖然法比加斯冇隨隊，但其餘主力都冇揸流攤，馬國站一戰，艾朗藍斯、禾確特、卡路士韋拿同路斯基都有「士哥」，嚟到杭州踢第二場，球員狀態應該比第一場好，表現會更理想。


杭州缺兩將難高估


FC杭州暫時喺中超排第八名，戰績係十六戰六勝五和五負，最近一戰主場與北京踢成○比○，而賽後杜威同榮昊暫時離隊參加國家隊集訓，令杭州無法以夫添迎戰阿仙奴，不過今場係表演賽，球迷嘅焦點係睇阿仙奴，估計杭州唔會玩死守，實行鬥攻娛樂大眾。