阿根廷撻着不勝無圭

猪拉多纳

16/07/2011
文： 巨高

兩支美洲國家盃奪冠次數最多球隊，阿根廷及烏拉圭明早喺八強淘汰賽碰頭。雙方已失落美洲國家盃有一段時間，故對於今屆冠軍極之渴求。尤其主辦國阿根廷，更加需要以冠軍獎盃去確立自己喺南美區嘅地位。今場阿根廷鬥志十足兼有主場之利，爭勝本錢比對手豐厚，2.45倍「讓球主勝」可留意。（有線61及201台周日早上6時15分直播）




阿根廷頭兩場分組賽的確踢唔出預期水準，好多主場球迷都向球隊柴台，美斯更慘成針對目標。不過阿根廷並未因此而洩氣，反而激發起球員潛在鬥心，仲喺第三輪分組賽踢番場爭氣波，以三比○大勝哥斯達黎加。實在阿根廷有能力踢好波，頭兩場冇料到全因球員狀態及陣式編排出現問題。


重用「皇馬兵」生晒


為盡快解決問題，帶領國家隊躋身淘汰賽，領隊巴迪斯達大膽求變，喺最後一場分組賽棄用泰維斯、甘比亞素、班尼加及拿維斯，改由加高、希古恩及迪馬利亞等人擔任正選。而呢班「皇馬兵」果然交到貨，協助球隊贏波晉級。另外巴迪斯達已事先張揚，今場對烏拉圭唔會變陣，十一個正選球員全部用番晒。似乎阿根廷經過上仗之後已搵啱最佳陣容，今場鬥烏拉圭必有好戲睇。


烏拉圭卡雲尼有傷


烏拉圭喺最後一輪分組賽雖能打敗墨西哥繼而晉級，但過程帶點牽強，未覺有太大進步。特別要提出墨西哥只係派小國腳出戰美洲國家盃，烏拉圭只能以一球小勝可謂唔合格。大型賽事好考球隊進度，阿根廷喺呢方面明顯比烏拉圭優勝。況且客隊射手卡雲尼有傷未必出得，對烏拉圭打擊就更大。