阿根廷變陣發威反轉烏圭

猪拉多纳

16/07/2011
文： 朱楓

勢估唔到阿根廷同烏拉圭2支美洲盃爭標大熱，聽朝就會喺8強對碰，齋睇美斯對科蘭已令人勁期待啦！不過講到狀態，美斯變做校炮手後返晒嚟，上仗仲化身「助攻王」，相當Sharp醒。相反科蘭唔止沉到爆，今場仲冇咁幾件拍檔，阿根廷贏兩粒開2.45倍「讓球主勝」冇難度吖！（有線61、64、201及203、中央5台周日早上6:15直播）




東道主阿根廷喺今屆美洲盃開頭表現令朱楓好失望，先後被玻利維亞同哥倫比亞逼和。為出線，佢哋上仗決心大變陣，改踢超進取嘅4213陣式，今季被皇馬雪到硬晒嘅加高，拍住馬斯真蘭奴竟然喺中場玩晒，鋒線就更加冇得頂，阿古路同迪馬利亞都有士哥之餘，希古恩拉開空位亦相當出色，最令朱楓感動嘅，係「球王」美斯交出2次助攻，原來佢墮後校炮，殺傷力仲勁！


沿用4213續雪泰維斯


係，雖然另一位前鋒泰維斯發火，要求踢正選9號中鋒位，不過據西班牙《阿斯報》報道，阿根廷領隊巴迪斯達堅信贏開有條路，所以今仗會沿用上場對哥斯達黎加嘅陣容，當泰維斯透明，一班正選球員，梗係會搏命用表現報答領隊嘅信任啦！




烏拉圭原先被譽為今屆美洲盃3大爭標熱門之一，點知踢落完全唔係路，雖然佢哋不斷變陣尋求突破，但最後一仗都只係小勝墨西哥B隊1:0，僅以C組次名出線，當中最令人失望嘅係科蘭、蘇亞雷斯同卡雲尼3大箭頭竟然全部食白果，特別係科蘭頻頻近門失機，信心真係跌至谷底。


烏拉圭冇態兩將缺陣


蘇亞雷斯尋日為咗壯聲威，無啦啦硬寸阿根廷進攻冇章法，查實公道自在人心，「烏圭」自己已衰到貼地，仲要咁樣撩交嗌，真係攞架嚟丟！最慘係前鋒卡雲尼因傷今場好大機會缺陣，中堅高亞迪斯又累積2張黃牌要停賽，面對以美斯為首嘅「西甲4俠」，隨時兵敗如山倒！


美洲盃賽制：


8強至決賽均以1場決勝負，若90分鐘賽和，不設加時，即互射12碼分勝負。

阿根廷旺開大

‧近8戰3勝3和2負，當中有6場開大。

‧近6次交手獲5勝1負。

烏拉圭防線曳

‧近8仗3勝3和2負，當中只得2場冇失波。

‧世界排名低阿根廷8位排18。