迪基亞報到high爆Twitter

猪拉多纳

20/07/2011


西班牙門將迪基亞於美國時間周日飛到西雅圖向曼聯報到，日前進行第一課操練，訓練員對佢嘅手法及反應都好滿意，迪基亞喺Twitter話好開心。由於上任正選門將雲達沙實在太出色，迪基亞話壓力好大，不過同時亦係推動力，絕唔會因此而害怕。




領隊費格遜就為來季英超做個小分析，佢認為曼城及利物浦可對紅魔衞冕構成威脅；對於車路士新領隊保亞斯，費格遜話佢要面對前所未有嘅挑戰，唔知呢個後輩頂唔頂得順咁話。至於阿仙奴，費格遜就話任何時間都唔可以忽視「兵工廠」，因佢哋班球員質素好高。


白賴仁笠臣擺費Sir上枱


此外，曼聯名宿白賴仁笠臣早前中「蛇伏」，搞到聲譽及地位受損，查實佢當日愈講愈興奮，仲擺埋費Sir上枱，話兩人依家仍然有聯絡，仲經常通電話講波經，費Sir仲會畀投X策略佢，命中率相當高，不過就唔係曼聯嘅比賽。




對於白賴仁笠臣言論，費Sir代表律師話唔可信，據報紅魔或取消白賴仁笠臣球會宣傳大使身份。