叱咤楓雲：紅魔大輪換難贏海灣者

猪拉多纳

20/07/2011
文： 朱楓

聽朝曼聯會展開美國之旅第2站，出戰西雅圖海灣者，朱楓覺得紅魔可能失威！事關領隊費格遜賽前話美職近年進步神速，又話一定會喺半場大輪換，似乎想鋪定輸波後路，再加上對手係美職近期至弗嘅海灣者，2.95倍「讓球主勝」博得過o架！（now640台及廣東體育周四早上10:00直播）




曼聯日前喺美國展開首站賽事，結果喺波士頓輕鬆大勝新英倫革命4:1，但其實4個入波都喺下半場取得，而且對手只係喺美職排尾二，根本唔反映曼聯已經上力。




領隊費格遜賽前話到明今場唔易過關，仲攞咗上年僅勝費城聯1:0，以及不敵肯薩斯1:2做例子。之後佢仲話今場會喺下半場換好多人嚟試陣，搵定輸波藉口，賽前朱楓仲八到好料，就係新兵菲爾鍾斯同迪基亞雖然已經同大隊會合，仲開始操練，但曼聯官網證實兩人最快會喺下場對芝加哥火燄先上陣。


海灣者連續9場不敗


對家西雅圖海灣者近況大勇，日前主場反勝急流4:3後，已累積9場不敗。呢支西岸勁旅平時一場波平均坐3萬7千人，但據講今仗已賣出6萬4千張飛，聲勢肯定浩大，再加上海灣者人腳唔曳，前線有前阿積士前鋒羅沙里斯拍哥倫比亞新星費迪蒙迪路，中場有上屆世盃烏拉圭國腳艾華路費南迪斯校炮，加埋老牌門將基拿把關，贏埋都唔奇！