曼城國米星光大匯演

猪拉多纳

31/07/2011
文： 巨高

都柏林超級盃最後一日比賽，尾場由國米對曼城。現効力曼城嘅文仙尼及巴洛迪利，以前都係國米成員，今日倒戈相向必成賽事焦點。而阿根廷前鋒阿古路亦證實有跟隨曼城飛抵愛爾蘭，好有機會替新球隊上陣。預計今場仍然會以表演性質為主，喺防守方面一定會比平常鬆散好多，大盤有望開出。（now 634及660周日晚11時30分直播）




都柏林超級盃連續兩日有比賽，東道主愛爾蘭聯賽隊今晚頭場先鬥些路迪（now 634及660周日晚9時直播），不過尾場先係戲肉所在。




國際米蘭已經公布咗都柏林超級盃以及意大利超級盃嘅大軍名單，較值得留意係有份出席美洲國家盃嘅球員未有入選，當中包括馬爾干、辛尼迪、甘比亞素及迪亞高米列圖，惟巴西首席門將施薩索拉斯被急召回隊。主要原因係新加盟門將維維安奴膝傷要抖半年，另一門將卡斯迪拿斯又撞傷頭未必趕及復出。雖然國米未能「夫添」上陣，但陣中一樣擁有豐厚入球本錢，起碼柏仙尼、伊度奧及史奈達等攻擊主力仍在陣中。


國米新帥崇尚進攻


再講，國米新帥加斯柏連尼一向着重進攻，當年執教熱拿亞以3-4-3全攻型陣式贏得一致好評，有理由相信加帥麾下嘅國米，今季會變得更具侵略性。其實陣內球員亦認同加斯柏連尼嘅進攻足球理念，料今場熱身賽畀到大家耳目一新感覺。




若論進攻能力曼城當然唔失禮，唔單只有迪斯高及巴洛迪利，最近仲以高價簽入阿古路，強大財力令其他歐洲豪門球隊既羨慕又妒忌，難怪海外媒體稱文仙尼為「幸運領隊」。曼城有唔少球員具入球能力，今場冇必要縮住嚟踢，反正熱身賽志在操弗狀態，球員都會放開心情享受足球，大手交易好合理。




都柏林超級盃賽制：除慣常贏波三分、和波一分及落敗冇分之外，入球亦會當一分數計算，即每支勝利球隊最少可取四分。若分數相同的話，則順序以下列條件決定排名︰1.得失球差、2.入球數字、3.射中目標次數、4.射門次數、5.抽籤。