鹿島拒絕投降增兵摧花

猪拉多纳

31/07/2011
文： 九叔

踢波好講心態，好似大阪櫻花呢排頻頻放走球員，例如今日主場對鹿島鹿角，就係乾貴士赴德前嘅告別戰，擺明對成績冇乜要求，呢場波仲要讓鹿島平半咪盞死，一於博下盤啦。（now 633台周日下午5:00直播）


乾貴士告別櫻花或錫身


櫻花呢輪嘅表現稱得上唔上唔落，近8場波贏4輸3和1，基本冇乜路可捉，但係至難頂嘅一點，係佢哋似乎冇乜大志，既將後備龍門丹野研太外借畀J2嘅大分三神，前日又同德乙嘅波琴斟掂數，將乾貴士呢個攻擊中場賣走埋，真係唔明佢哋想點。好衰唔衰，中場高橋大輔又左邊面頰骨折，至少休養3個月，可用兵源愈玩愈縮，完全睇唔到佢哋有心爭取好成績。




鹿島就唔同嘞，無疑佢哋近8場波只得兩勝，排到第15位，早就無緣爭標，不過就高層心態嚟講，呢支傳統勁旅並冇放軟手腳嗌投降，針對鋒將興梠慎三右小腿一直有傷，馬上由巴西增兵，借用咗富明尼斯前鋒蘇亞雷斯（Silva Soares），呢個22歲o靚仔雖則冇乜名氣，但話晒都係前巴西U18代表，啲料夠响J聯賽搵食o架嘞，由呢點可以睇到，鹿島係不甘沉淪嘅，心態同櫻花完全掉轉。




雖然乾貴士話今場波係佢响櫻花嘅最後一戰，踢完就動身去德國，但係你咪以為佢會死搏，唔通想臨上機至受傷咩？所以話櫻花隊波今日嘅比賽心態幾有問題，咁都學人讓波，梗係博鹿島下盤着數啲啦，何況佢哋近10年聯賽主場對鹿島嘅勝率，都係得43個巴仙咋。